الـ AI لحس دماغك: خطر الاعتماد المفرط

لو أنت معتمد على الـ AI بشكل كبير لازم تقرا البوست ده

مبدأ التمرين وأهميته

أي حاجة ينفع تعملها في حياتك، لو مش بتعملها كتير، مخك وجسمك مش هيديها أهمية ولا هيطورها، ولا هينميها. مبدأ التمرين اللي أنت عارفه بتاع الرياضة ده بينطبق على كل حاجة ينفع تتعمل في الحياة عمومًا.

حتى مجرد إنك تبص على شاشة، أنت شوفت زيها كتير حتى لو مش فاهم هي شغالة إزاي، "متمرن" على رؤية شئ مستطيل بينور وبيظهر عليه صور ونصوص، عشان كده بالنسبالك الموضوع عادي. إنما لو جه حد من أي عصر قديم هيفتكره سحر 😅. كذلك سواقة الدراجات مثلاً، كل شئ ممكن تطبق عليه مبدأ المِران.

مبدأ التراجع: اللي مش بيزيد بينقص

وده ينقلنا للنقطة التانية. أنت عندك قاعدة مهمة في الحياة: اللي مش بيزيد فهو بينقص، مفيش حاجة اسمها ثابت مكانه!

لإن حياتك دي مش مطلقة، كلها نسبية، والعالم كله بيتحرك في شتى الاتجاهات، فحتى ثباتك مكانك بالمعنى الحرفي يخليك بتتحرك بشكل نسبي. كذلك لو ذاكرت شئ كويس جدًا وسيبته بعدها، مهارتك فيه هتقل مع الوقت، ممكن تنساه، ممكن حتى تنسى إزاي تعوم لو قعدت فترة طويلة جدًا منزلتش في الماية.

الخطر الحقيقي: تراجع مهارة التفكير

كده إحنا خلصنا إن اللي مش هتعمله بنفس المقدار كل يوم هتقل قدرتك عليه، مش هتفضل ثابتة. بس هنا النقطة الخطيرة، عارف إيه اللي أنت بتعمله بشكل أقل بقالك سنتين؟

التفكير!

أيوة أنت بطلت تفكر، بقيت أي حاجة بتستسهل ترميها لأي شات بوت يعملهالك، وبيعملها فعلاً.

لما الآلة الحاسبة اتعملت وكله بقى بيستخدمها بشكل يومي، مهارة الحساب عندنا اختفت، وبقيت منحصرة في التجار وسواقين الميكروباص، شوف آخر مرة لميت الأجرة وشك كان عامل إزاي 😂. بس دي مهارة الحساب، بسيطة مش مشكلة.

إنما التفكير؟ تخيل إنك مش عارف تفكر إزاي! والله رعب.

أنا بكتب البوست ده عشان قعدت قدام امتحان من شوية مش قادر أشوف السؤال بيقول إيه، الـ Muscle memory بتقولي: أنت لسة هتفكر؟! خده كوبي وارميه لشات بوت!!! لحظات من العجز التام متمناش حد يعيشها أبدًا.

دعوة للعودة إلى التفكير

عشان كده أنا بدعوك ترجع تفكر، حل مشاكل، أقل حاجة مرن نفسك تكتب وتصيغ بدل ما هو يكتبلك ويصيغلك.

الموضوع ده أنا اتكلمت عنه قبل كده من 5 سنين بالظبط، في بوست بعنوان link to be added، إزاي إن كل حاجة في الحياة هي مشكلة، وقدامك خيارين: إما إنك تعمل سيستيم يحلها وتفقد القدرة على حلها، أو تتعامل معاها بنفسك كل مرة وتفضل معاك المهارة دي تستخدمها في أي وقت.