خطأ شائع: يعني إيه ATS؟

كتير يقولك إنه بيعمل الـ CV بنظام الـ ATS، أو يقول إن مهم الـ CV بتاعك يعدي من نظام الـ ATS الأول، أو يقول ده تمبليت بنظام الـ ATS.

ده كلام لما تسمعه هيخليك تعتقد إن الـ ATS ده سيستيم ثابت زي سيستيم الطيران كده، موجود عند كل الشركات وبيستخدموه في التعيين. الكلام ده خاطئ تمامًا.

يعني إيه ATS؟

كلمة ATS هي اختصار لـ Applicant Tracking System. ده نوع كامل من البرامج بتستخدمه بعض الشركات الكبيرة عشان تفلتر عدد الـ resumes الكبير اللي بيوصلها، وعشان تتابع مراحل كل اللي مقدمين على الشغل.

ليه الناس بتستخدم 'نظام ATS' ده؟

ببساطة عشان سهل برامج استخراج الـ PDF تقراه. حاليًا، طوب الأرض بيستعمل الـ LLMs عشان يقرا السيفيهات. فلو عايز تشوف الـ CV بتاعك بيتقري ولا لأ، ببساطة ممكن ترفعه لـ ChatGPT أو Gemini وتقوله: "اديني كل البيانات اللي في الـ CV ده".

لو رجعلك حاجة ناقصة يبقى فيه مشكلة، غير كده تبقى في السليم.

حتى لو الـ CV بتاعك عامل فيه الخط بفونت مستحماش ومصغره لـ 5px؟ آه ده هيعدي من السيستيم عادي، بس طبعًا فيه مراجع بشري مش هيقرا 😆.

الشكل مش كل حاجة: ما يهم حقًا

تعرف إن بعض اللي شغالين حاليًا في جوجل وأمازون وميتا كانوا عاملين الـ CV بتاعهم عمودين وفيه زخارف وألوان وأشكال حلوة وحاطين صورتهم عادي؟ مش بقولك تعمل كده لإنه لكل مقام مقال، أنا بس بثبتلك إن مفيش حاجة اسمها "نظام ATS" بالشكل اللي في دماغك ده.

عارف إيه اللي هيفرق معاك بجد؟ تنظيم الـ CV. المراجع البشري بيستلم كمية كبيرة من الـ CVs، ممكن يفلترهم بـ keywords معينة الأول، دي بطبيعة الحال لازم تكون مزبطها مع الـ AI وأنت بتكتب الـ CV المخصص لكل شغل لوحده.

وبعدها المراجع بيبص أقل من 5 ثواني عالـ CV بتاعك. أنت في الـ 5 ثواني دول لازم تقوله على كل اللي محتاج يعرفه، تخلي كلمتين هنا bold، تشيل حاجة ملهاش لازمة، وهكذا. افتكر، أنت محتاج تقوله إنك جامد 😆، مش محتاجه يعرف قصة حياتك! 💀

دمتم بخير ❤️