إزاي تشتري فلاشة؟

اللي قدامك في الصورة ده نتائج تجربة 8 فلاشات موجودين عندي، فيها البنشماركس ونتائج التجربة الحقيقية والاستخدام. وعلى هذا الأساس أنا جاي أقولك إزاي تشتري فلاشة.

الخطوة 1: تحديد الغرض

لو عاوزها عشان تسطب بيها ويندوز أو برامج وكده، فأنت مش محتاجها تكون معاك طول الوقت، بس أنت بالتأكيد محتاجها فلاشة سريعة.

أما لو عاوزها عشان تنقل بيها مستندات وملفات المشاريع بينك وبين زمايلك، فأنت عاوزها فلاشة تستحمل عربية تدوس عليها، وسرعتها مش هتفرق.

الخطوة 2: اختيار الفلاشة

هتلاقي فلاشات مكتوب عليها USB 3.1 وUSB 3.2 وكلام فاضي من ده. إفهم النقطة دي كويس: أي وحدة تخزين مكونة من جزئين، الجزء الأولاني هو الـ BUS، أيوة أوتوبيس، ده الجزء المسؤول عن توصيل وحدة التخزين بالجهاز، والجزء التاني هو الفلاشة اللي بتخزن الداتا.

مثال جانبي: بتسمع عن SSD ساتا مثلاً، الـ SATA دي وسيلة مواصلات بين الـ SSD والجهاز، ليها حدود في السرعة اللي تقدر تنقلها، بس مش هي السرعة القصوى للـ SSD.

الـ USB 2.0 أقصى سرعة ليها هي 40 ميجابايت في الثانية، دي سرعة أعلى من أغلب الفلاشات أساساً. فلو قدامك فلاشتين، واحدة USB 2.0 والتانية 3.0، مش معناه إن الـ USB 3.0 أسرع. بكرر: دي مجرد وسيلة مواصلات من الفلاشة للجهاز، الفلاشة نفسها ممكن تكون تعبانة.

الـ USB 3.0 هو نفسه الـ 3.1 Gen1 هو نفسه الـ 3.2 Gen1، دي مجرد إعادة تسمية حصلت كذا مرة، وهتحصل تاني في USB 4.0، فمتخليش حد يضحك عليك برقم شكله أعلى، وكلهم من حيث السرعة القصوى 5 جيجابت/ثانية.

دلوقتي شوف الجرافات اللي في الصور واسألني في أي حاجة عاوز تستفسر عنها فيهم.