أفضل مستعرض صور؟

كنت بدور على برنامج مستعرض للصور على ويندوز غير Photos بتاع مايكروسوفت عشان بيشتغل ربع الوقت والربع التاني بيعمل تصرفات غريبة والنص الأخير مبيشتغلش أساساً.

المهم عديت على كذا برنامج، أذكر منهم ImageGlass وكان شكله بيقول إن ده فعلاً البديل الممتاز، وهو برنامج مفتوح المصدر. استخدمته كذا شهر بس كل فترة كدة بلاقي نفسي بفتح برنامج مايكروسوفت بشكل متعمد عشان أشوف بعض الصور اللي هو بيظهِرها غلط، زي الصور الـ RAW مثلاً. كذلك الأداء بتاعه كان سيئ جداً معايا. وأخيراً لقيته بيعيد اختراع العجلة بدل ما يستخدم الاختصارات والواجهة المعروفة.

المشكلة والحل

عموماً طنشت البرنامج اللي بيفتحلي الصور وكنت بستخدمه لغاية ما جت مرة واحتجت أحدد مجموعة صور كويسة من ضمن مجموعة كبيرة وأنقلهم لفولدر لوحدهم. برنامج مايكروسوفت مكانش بيخليني أبدل بين الصور أساساً (هو كدة بمزاجه)، فكان لازم أفتح صورة وأشوفها وأقفلها وأنقلها لو عايزها، خطوات كتيرة جداً.

وأنا بدور على حل للمشكلة دي قابلني مستعرض صور اسمه Nomacs. حملته على أساس إن فيه خاصية تحديد الصور، ملقيتهاش واضحة قدامي، بس بالغلط وأنا بسحب على الشاشة بالماوس لقيت الصورة بتتسحب معايا كملف وأقدر أنسخها لأي فولدر تاني. فاستخدمته، ومن ساعتها مقابلتش معاه أي مشاكل.

ليه Nomacs؟

• مبيحاولش يعيد اختراع العجلة.
• أي حاجة بعملها بشكل لا إرادي بينفذ اللي أنا متوقعه بالزبط.
• بيعرض الصور الـ RAW بشكل أسرع بكتير من برنامج مايكروسوفت.
• والأهم: بيشتغل بفعالية!

البرنامج أوبن سورس ومدعوم في كل المنصات. أنصحك تجربه بل تستخدمه كبرنامج أساسي.

روابط التحميل

قم بزيارة الموقع الرسمي لـ Nomacs:
Nomacs.org