عمر الـ SSD وصحته: دليلك الشامل لمتى تقلق ومتى تطمئن

ملاحظ الفترة اللي فاتت إن كل اللي معاه 500 جنيه راح اشترى بيهم SSD، ده زود عدد البوستات من الناس اللي بيقلقوا من الـ Health بتاعه وبيتخضوا لما يلاقوا الـ SSD قاعد شهرين والهيلث بتاعه نزل لـ 98%. في المقال ده هتعرف ليه ده بيحصل وليه المفروض متقلقش.

إيه هو الـ SSD؟

كتير منكم عارفين إيه هو الـ SSD، بس اللي ميعرفش فهو وحدة تخزين زي الهارد بس أسرع بكتير عشان مفيهوش أجزاء متحركة. القراءة منه أو التغيير فيه معتمد على مرور التيار بس، ووجوده من عدمه بيفرق جدًا في آداء الجهاز. عيبه الوحيد هو محدودية عدد مرات الكتابة عليه.

شوية تفاصيل زيادة: الـ SSD ممكن يتوصل بنفس توصيل الهارد العادي SATA أو بتوصيلة تانية اسمها M.2 واللي غالبًا بتدعم بروتوكول جديد اسمه NVMe مخصص للتعامل مع وحدات التخزين السريعة جدًا.

العمر الافتراضي للـ SSD: هل هو قنبلة موقوتة؟

الهارد العادي HDD صعب تتوقع هيفشل امتى بسبب اعتماده على الميكانيكا في طريقة عمله، لكن الـ SSD من أول ما تشتريه بتكون عارف هو هيقعد معاك قد إيه، لإنه عبارة عن قنبلة مؤقتة في جهازك، مظبوطة على 10 سنين!

ده اللي هيقولهولك جوجل لو سألته الـ SSD بيقعد قد إيه، لكن الواقع مختلف، أنواع الـ SSDs بتفرق، وأنواع الناس اللي بتستخدمه بتفرق أكتر.

بعض الشركات المصنعة للـ SSD بتديك رقم يمثل كمية البيانات اللي تقدر تكتبها عالـ SSD. هتلاقيه مكتوب زي كده xTBW بمعنى Terabytes Written سواء في الموقع أو الـ manual/flyer بتاعهم. الـ SSD المتوسط زي كروشال وكينجستون وغيرهم في الـ SSD بحجم 120GB هيديك عليه TBW بقيمة 45 تيرا. لو حسبتها (موقع الشركتين حسبها بالفعل) هتلاقي إنك لو استخدمت الجهاز لمدة 5 سنين هتحتاج تكتب عليه كل يوم 21GB من غير ما تفوت يوم.

شركة زي سامسونج بتزعم إن أي SSD من عندها في فئة الـ 850 Pro يقدر يستحمل 150TBW بضمان 10 سنين. ده كتير أوريدي، بس ده... كلام الشركات، والشركات بتحب تفضل في الأمان.

تجارب واقعية: الـ SSD يتحمل أكثر مما تتوقع!

مجلة c't الألمانية عملت تجربة على مجموعة من الـ SSDs في سنة 2016، جابوا 7 أجهزة وشغلوهم كتابة وقراية مستمرة بدون توقف، التجربة انتهت في 2017.

النتيجة كانت مفاجئة: سامسونج كذبت، الـ SSD 850 Pro بتاعهم مكتبش 150 تيرا، ده كتب 9.1 بيتابايت! حتى الأجهزة الرخيصة قدرت تكتب أعلى بكتير من الموعود بيه، كروشال BX 200 بحجم 240 جيجا قدر يكتب أكتر من 200 تيرا (الموعود بيه 90 تيرا).

نخلص إلى إن الـ SSD بتاعك في الغالب هيكمل معاك أكتر من 7 سنين تحت الشغل العادي أو 5 سنين تحت الطحن اليومي.

قراءة صحة الـ SSD: هل البرنامج بيخرف؟

قبل أي حاجة، أي برنامج بيشوف الـ health بتاع الهاردات ووحدات التخزين بيعرف المعلومات دي من خاصية S.M.A.R.T اللي موجودة في أغلب أجهزة التخزين. الخاصية دي بتعرف كمية الداتا اللي اتكتبت على الـ SSD، فممكن تبص بصه في البرنامج اللي بتستخدمه. لو معندكش واحد، فأرجّحلك برنامج Crystal Disk Info عشان مجاني وصغير وبسيط وبيدعم اللغة العربية. بمعنى هتلاقيه في أول نتايج بحث جوجل.

مقولة شائعة على كل البوستات اللي فيها سكرين شوت من HDD Sential إنه بيخرف مع الـ SSD. المقولة دي جت منين؟ واحد فتح البرنامج لقاه كاتب جنب health الـ SSD بتاعه 0% لكنه فضل شغال عادي، فطبيعي جدًا يفترض إنه بيخرّف... والناس شافت الكلام ده وبالاعتماد عالـ common sense بدأوا يتداولوه وأنا مبلومش حد منهم ولا بلوم صاحب الافتراض الأولي، ده افتراض صحيح. ولكن....

هل البرنامج بيخرف فعلاً؟

لا، البرنامج بيقرا الداتا اللي في خاصية S.M.A.R.T ويعتمد عليها بشكل كلي في حساب الـ health بتاع الـ SSD. الداتا اللي بيدور عليها دي هي:

• Remaining Life Percentage
• Media Wearout Indicator
• Wear Leveling Count
• Percentage Of The Rated Lifetime Used
• SSD Life Left
• Percentage used endurance indicator
• Available Spare Percent
• Percentage Used

لما يلاقي أي حاجة منهم بياخد قرايته في الحسبان، وبيطلّع قراية دقيقة بناءً على الداتا اللي الـ SSD مديهاله، وبيكتبلك هو مُعتَمِد على إيه من الداتا دي بالتحديد.

إمتى يكون بيخرف بقى؟

حالتين:

1. أولهم: إن يكون البرنامج معموله offset يدوي في إعداداته يخليه يضيف أو يطرح قيمة محددة على واحد من أو كل داتا S.M.A.R.T، وطبعًا لو أنت محمل البرنامج من موقعه الرسمي فاتأكد إن ده مش حاصل.
2. ثاني حالة: إن يكون مُصَنّع الـ SSD عامل قيمة threshold حساسة زيادة عن اللازم. مثال خيالي: الـ SSD بتاع شركة X الخيالية مقرر إن آخره يكتب 10 تيرا داتا، فبيحط percentage من القيمة دي في واحدة من السمارت داتا السابق ذكرها (وطبعًا الـ microcontroller هو اللي بيقوم بالحسبة دي وتخزينها).

النتيجة إيه؟ زي ما قولنا، كل الـ SSDs تقريبًا بيقدروا يشيلوا ضعف الداتا اللي الشركات بتقول إنه يقدر يشيلها، خصوصًا بتوع سامسونج. فالبرنامج مش بيخرف لا، بل بعد ما يوصل لـ 0% ممكن بيانات تضيع وسيكتورز تتحول لـ read only، وممكن يحصل failure، أي باختصار... مبقاش درايف يُعتمد عليه....... لكن شغال عادي!

الـ HDD مقابل الـ SSD في قياس الصحة

المضحك في الموضوع إن البرنامج ده وأي برنامج تاني الحقيقة ميقدرش يحدد قيمة صحيحة للـ Health بتاع الهارد HDD، وده بسبب اعتماده على الحركة الميكانيكية. لو جبت هارد جديد وفتحته من كيسته (لسه جديد مفيهوش تفة) وقمت موقعه عالأرض من غير قصدك، فعليًا هو كده اتضرر جدًا، لكن لو وصّلته وفتحت أي برنامج بيقيس هيلث الهاردات هتلاقيه كاتبلك 100% بيرفيكت وnothing more to do وهاتلك كوباية شاي وروّق كده، بس بعد الاستخدام فترة هتلاقي الهيلث بيقل بطريقة غبية وده عشان خاصية S.M.A.R.T بدأت تسجل الأخطاء الملحوظة اللي في الهارد، وبرضه مش هتقدر تجيب كل الأخطاء.

واطمن، الـ SSD بتاعك هيطلع من المدعكة بعد زمن طويل.

توضيحات:

• لفظ "هارد" مينفعش يتقال على الـ SSD، من فضلك إعرف ونفذ كده.
• لو عندك SSD بحجم أكبر اقسم حجمه على 120 واضرب الناتج في 45 هيديك الـ TBW بتاع جهازك.

أي أسئلة تشرّفني في الكومنتس.