سر تصنيع المعالجات ونماذج الذكاء الاصطناعي: لماذا يبدأ الإطلاق بالنسخ الأكبر؟

عارف ليه الشركات بتنزل المنتج الكبير بعد كدة المنتجات الصغيرة؟

يعني مثلاً جوجل لما نزلت Gemini 2.5، أول واحد نزل كان الـ pro، بعد كدة الـ flash.

كذلك في كروت الشاشة انفيديا نزلت الـ RTX 5090 أول حاجة (ونزل معاه الـ 5080 والـ 5070)، بعد كدة نزلت الـ RTX 5060 وبعديه الـ RTX 5050.

برضه في سوق المعالجات وسوق الموبايلات، هتلاقي الفلاجشيب التقيل بينزل الأول بعد كدة النسخ الأصغر.

تفتكر ليه؟

مش حركة تسويقية ولا عشان يبانوا جامدين بالفلاجشيب ولا حاجة (رغم ان أي ماركتير هيعلن عن الفلاجشيب الأول كدة كدة 😆 بس مش ده السبب).

في أوقات نادرة هتلاقي الوسطاني هو اللي بينزل الأول بعد كدة النسخة الأعلى وآخر حاجة الأقل، دي أغلب الوقت بتبقى فعلاً حركة تسويقية.

السبب الحقيقي: طريقة الإنتاج

السبب الحقيقي هو طريقة إنتاج الحاجات دي.

موديلات الذكاء الاصطناعي (AI)

الـ AI لما بيمرنوه بينتجوا أكبر موديل يقدروا يعملوه، بعد كدة يعملوا منه نسخ مستقطعة عن طريق عملية الـ distillation، اللي هي بياخدوا الناتج بتاع الموديل الكبير ويمرنوا الموديل الصغير عليه ✨ يخلوه "يقلد" الموديل الكبير.

يعني الصغير بيكون نسخة مستقطعة من الكبير؟ أيوة بالزبط!

المعالجات وكروت الشاشة

خليني أطبقلك نفس المبدأ على المعالجات، انتل مش بتصنع غير 3 أو 4 معالجات في الخط كله (بفرض انهم نفس الجيل).

ده بيشمل كل الـ i3 وكل الـ i5 وكل الـ i7 وكل الـ i9، بما فيهم معالجات الديسكتوب واللاب توب.

مثلاً الجيل الـ 12 معمول في 4 خطوط بس، بس فيه أكتر بكتير من 4 معالجات.

ده حتى الـ i5 فيه منه الـ 12400 والـ 12600 (وكل واحد منهم ليه كذا نسخة مختلفة).

فوق كدة الديسكتوب ليه خطين بس من الـ 4 🫠 ازاي؟

هوضحلك:

• الديسكتوب في الجيل الـ 12 فيه خط بيتصنع بـ 6 أنوية قوية بس.
• وخط بيتصنع بـ 8 أنوية قوية + 8 أنوية ضعيفة (اللي هي الـ efficiency cores).

كدة بقى معاك الـ i9 12900 والـ i5 12400.

الباقيين فين؟ 😆 شوف يا سيدي لما الـ i9 بيطلع من "الفرن" ونيجي نعديه على اختبارات الآداء، ممكن منلاقيهوش شغال، نلاقي واحدة من الأنوية الضعيفة طلعت خربانة، نعمل ايه بقى؟ نرميه؟!

لا، هنعطل 2 من الأنوية الضعيفة منهم الخربانة، ويبقى عندنا i7 12700 🥳

طب الـ i5 طلع خربان فيه نواة، نعطلها ومعاها واحدة كمان بقى معانا الـ i3 12100.

طب كارت الشاشة المدمج طلع مش شغال! بسيطة، بروسيسور F 😂

يعني مفيش حاجة اسمها i3 أصلاً؟ لا مفيش، هو مجرد i5 متعطل فيه نواتين :""D

نفس المبدأ بيتطبق على كروت الشاشة، نفس المبدأ بيتطبق على الموبايلات (بس بدل ما نعطل أنوية هنشيل شوية حاجات من البوردة) وهكذا.

مناسبة البوست

واللي هيسأل طب ايه مناسبة البوست ده؟ إجابتي هي: لازم يكون فيه مناسبة يعني 😆

عموماَ طالما مُصر، مناسبته إن Gemini 2.5 Pro من امبارح بيعمل أسوء آداء شوفته في حياتي 🤡 غالباً عشان جوجل حبت تقلل حجمه عشان تقلل تكلفة تشغيله 🫠

أي أسئلة في الكومنتات، دمتم بخير ❤️